'பத்து'ப்பாட்டும் எட்டுத்'தொகை'யும்

ஆன்மீகமும் அருமை தமிழிலக்கிய பாடல்களும் அதன் பொருள்விளக்கமும் என்று நிஜமாகவே மணந்துகொண்டு இருக்கும் தமிழ்மணத்தில் தமிழுக்கு தொண்டு செய்யாமல் இருந்துவிட்டால் அதன் பிறகு நான் வலைப்பதிந்து என்ன பயன்?

ராகவன், குமரன்... உங்களது பதிவுகளுக்கு இப்படியும் ஒரு கெட்டவிளைவு இருக்குமா என்ற பேரதிர்ச்சி உங்களை தாக்காமலிருக்க கந்தன் உங்களுக்கு அருள்புரிவாராக...

பெரிய மனசுவைச்சு மன்னிச்சுருங்க.. மயிலாரை விட்டு கொத்த விட்டுராதீகப்பூ!!!

'பத்து'ப்பாட்டு

ராகம்: கபோதி தாளம்: லோக்கல்

ஏஞ்சோக கதைய கேளு வலைக்குலமே!!!

நாலுநாளா வீட்டுக்குள்ள இருக்கமுடியல
கிச்சனோட கப்புரொம்ப தாங்கமுடியல
ஊருக்குபோன பொண்டாட்டிய திட்டமுடியல
எச்சத்தட்டு பாத்திரத்தை கழுவமுடியல

ஈமொய்க்க தட்டுங்க காய்ஞ்சுகெடக்குது
காபிடம்ளருல கரப்புங்க ஓடியாடுது
கரண்டில காளானு பூத்துக்கெடக்குது
ஆகமொத்தம் அடுப்படியே ஆடிக்கெடக்குது

மொதநாளு சாம்பாரு காரசாரங்க
அடுத்தநாளு ரசம்கூட ஓக்கேதானுங்க
நூடுல்ஸு ரெண்டுவேள பேஜாராச்சுங்க
தேடிவந்த பிஸ்ஸாவும் பீச்சிருச்சுங்க

ஊத்தறப்போ தோசமாவு வட்டமாச்சுது
எடுக்கறப்போ ஃபெவிக்காலு தோத்துப்போச்சுது
அல்பஆனியனால கண்ணுகரெண்டும் தாரையாச்சுது
குக்கருகூட எரிமலையா பொங்கிப்போச்சுது

அதிகாலையில பாலுவாங்க கண்ணுநோவுது
குனிஞ்சுநிமிந்து கூட்டும்போது முதுகுதெரிக்குது
நாலுகரண்டிக்கே முழு'விம்'மும் கரைஞ்சுபோகுது
ஜட்டிபனியனுங்க வீடுமுழுசும் பல்லைஇளிக்குது

வறசோத்துக்கு டொமெட்டோசாசு கொஞ்சம்ஓவரு
அஞ்சாநாளே அடிக்கிதுங்க லைட்டாஃபீவரு
கும்பிகாய்ஞ்ச என்நெலமை கிழிஞ்சநிஜாரு
கட்டுனவ இல்லைன்னா லைஃபேபேஜாரு

வருங்கால மணமகனே கொஞ்சம் காதைத்தொறப்பா
அடிபட்ட அண்ணன் சொல்லை நெஞ்சிலேத்தப்பா
சுடுசோறு ரசமாச்சும் வைச்சு பழகப்பா
கட்டையில போறமட்டும் கவலையில்லப்பா

எட்டுத்'தொகை'

ராகம்: வேறென்ன.. முகாரி தாளம்: வயித்துப்பாடு

சம்பளம்போட்ட அஞ்சாநாளு பாதியக்காணல
வாங்கிப்போட்ட ஃபிளாட்டுEMI கட்டிமாளல

கிரெடிட்கார்டு ரிமைண்டருகாலு கேக்கச்சகிக்கல
அதக்கட்ட அடுத்தலோனு சேங்சனாவல

ஆட்டோலோனில் காருஓட்ட மனசுமருகுது
பெட்ரோல்பங்ஃகில் நிறுத்தும்போது குலையறுக்குது

CTC கேக்கையில குஜாலாயிருக்குது
டேக்ஹோமு பார்க்கையில காத்துபோகுது

பத்துவருசமா TAXகணக்கு பூச்சிகாட்டுது
பேலன்சு பார்க்கையிலே மனசுநோகுது

"சம்பாதிச்ச காசையெல்லாம் என்னபண்ணற?"
எங்கப்பன் கேள்விக்கு பதிலுதெரியல

"பிடித்தம்போக அஞ்சாயிரத்துல குடும்பம் ஓடுச்சு"
எங்கம்மாவோட பிரம்மசூத்திரம் மண்டையிலேறல

சம்பாத்தியம் எதுக்குன்னு இன்னும் வெளங்கல
இருட்டுக்குள்ள குருட்டுவாழ்க்கை ஓட்டம் முடியல

- இலக்கியக்கபோதி இளவஞ்சி