செவ்வாய், மார்ச் 15, 2005

அப்பாவின் சட்டை

Image hosted by Photobucket.com

கை சற்றே நீளமாயிருப்பினும்
எனக்கு சரியாகத்தான் இருக்கிறது
மொடமொடப்பான மடிப்புகள் விரைத்த
அப்பாவின் கதர்சட்டை

படியவாரிய ஈரத்தலையுடன்
கற்பூரம் கண்ணிலொற்றி
வெண்ணிற பட்டையிட்டு
ஒருமுறை முகர்ந்து மெதுவாய் உதறி
தலைவழியே அணிவார் இதை
நிறைவாகத்தானிருக்கும் பார்க்க
சாமிபடத்துக்கு சட்டமிட்டதைப்போல

கழுத்துப்பட்டை சற்றே பழுப்பேறி
தையல் பிரிந்திருந்தாலும்
வானத்தின் வெளுப்பாய்
லேசான நீலத்தில்

பாக்கெட்டின் மைகசிவு
துவைத்தும் போகாமல்
அவரின் பின்குறிப்பாய்

நாப்தலின் மணத்தையும் கடந்து
மெல்லியதாக பரவுகிறது
பெட்டி போட்ட வாசம்
உணரமுடிகிறது இருப்பை

ஏனென்று புரியவில்லை
முதலில் நன்றாயிருக்கிறதென்ற அம்மா
பிறகு விசித்து அழுதது

2 கருத்துகள்:

  1. நன்றாக இருக்கிறது!
    -முரசு

    பதிலளிநீக்கு
  2. எப்படிச் சொல்வதென்று தெரியவில்லை.....எனக்கும் அம்மாவுக்கும் நேர்ந்த அதே உணர்வுகள்....சில சோகங்கள் தரும் வலிகள் ஒன்றுதான் போலும்.
    அன்புடன் அருணா

    பதிலளிநீக்கு